عرض مشاركة واحدة
قديم 12-29-2014, 05:54 AM   #71


الصورة الرمزية محمد ابوعمر
محمد ابوعمر غير متواجد حالياً

بيانات اضافيه [ + ]
 رقم العضوية : 2
 تاريخ التسجيل :  Oct 2010
 أخر زيارة : 12-28-2017 (11:59 AM)
 المشاركات : 50,970 [ + ]
 التقييم :  413
 الدولهـ
United Arab Emirates
 الجنس ~
Male
 MMS ~
MMS ~
لوني المفضل : Mediumblue
افتراضي



ضحك من المغصة/////
يا جماعة الخير،، الناس دى هنا ما ساعين غير الكلاب والجريوات،،، وبحبوهم زى الأطفال واحد!!!! يعنى لو ماشى فى الشارع والله فى المواصلات العامة والله دخلت ليك سوبرماركت وجات واحدة بت لزينة داخلة المحل وشايلة ليها جريو فى صفحتها زى الشافع،،، وبعدين عاينت وما أتبسمت وقلت ما شاء الله، يا حلاتى يا ناس على الكمبشوش الحلو ده،،، الله يغطيه،، الناس دى يكشروا ويحمروا ليك وفى نفسهم يقولوا ليك يا ما عندك رحمة ياقلبك قاسى!!!!
بالليل دخلت لى سوبرماركت وجات واحدة مغطغطة ليها جريو من البرد ومدخلاه جوة شنيطة وما باين غير رويسو،،، فى المحل طلعتو وقعدت تلوليه فوق كتفها وتدور حول نفسها وتطبطب عليه وتبوس فيه زى الجنا بس، وجات الشغالة فى المحل ومسكتو منها وكمان هاك يا بوس ولولاى وكل شوية تقول ليك عسل، زى القمر، يجنن،، وااااااو!!!! أها بت اللزينة صاحبة الجريو قالت عايزة تشترى ليه فى الكريسماس حاجات تجنن،، وطبعا هسى داخلة السوبرماركت تشترى ليه أكلو من المعلبات!!!!
أعاين فى الجريو وببسمة خبيثة أرجع للوراء ألى زمن الطفولة وأتذكر كلبتى البيضاء اللى راحت هدر وأخدت أعدام مع سبق الأصرار والترصد من عمى محمد سعيد السنى، الله يرحمو ويبشبش تربتو!!! زمان كان مربى لى جريوة بيضا لامن بقت كلبة،، وبعدين المجنونة الظاهر على حسب كلام عمى بقت تسعر،، وباين عليه كان كلام وشوشة من أمى وحبوبتى فاطنة الحرم وفاطنة الزينة مرت عمى عشان يخلصو من الكلبة،، قالو أيه؟ الكلبة بقت تآكل السواسيو ولازم يقتلوها!!!!
والكلام وقع فوق جرح لى عمى وأصلو كراهيتو عما للكلاب،، المهم قام وصى أبورزقة أخوى الله يرحمو وعباس السنى ود عمى عشان يسممو تعيسة الحظ المولودة فى بلد كلابها منبوذة،، أها الحروم جابن الصبغة وحشو بيها جدادة ميتة وختوها فى مكان ما كلبتى بترقد!!! وأنا ما قادر أحوش الموت من المسكينة دى أمام نهرزة عمى وجوطة الحروم وفتونة أبورزقة وعباس!!!! أها المجنونة طبعا ضربت ليك الفروجة بى سمها وقعدت تولول وشكلها بقى شاحب وعيونا سود!!! وعمى الله يرحمو كان محضر ليك حبل سلبة وفرار سنين!!! أها قامو ربطوا المسكينة من رقبتها وعلقوها ليك فى النيمة قدام البيت،، عمى السنى شال الفرار وكان أشولنجى الله يرحمو،، يا زول خبط ليك المسمومة خبطة واحدة فى نص راسا لمن شقاهو أتنين!!
الشريط ده كلو دار فى راسى وأنا داخل السوبرماركت وبعاين فى دلع الجريو هنا،،، الله يرحمك يا عمى السنى،، لو كنت عملت عملتك السودة دى هنا،، كنت أخدت حكم بى سجن مؤبد!!!!
هنا تعامل الكلاب ويعتنى بها عناية فايقة، لها مراكز تسويق،، عيادات ومستشفيات خاصة،، أى أهمال من صاحب الكلب يؤخذ منه ويودع دار رعاية خاصة،، أى جريمة بحق كلب قد تودى بصاحبها السجن وتكلفه غرامة مالية!!!!
عالم مجنون، عالم مهووس، عاااااااالم فااااااضى.

أبوناجى/
كندا


 
 توقيع : محمد ابوعمر

مواضيع : محمد ابوعمر



رد مع اقتباس