منتديات الحصاحيصا

منتديات الحصاحيصا (http://www.alhasahisa.org/index.php)
-   فنان الاسبوع (http://www.alhasahisa.org/forumdisplay.php?f=40)
-   -   الفنان هاشم ميرغني (http://www.alhasahisa.org/showthread.php?t=9238)

محمد ابوعمر 09-28-2014 02:58 PM

ظلمك لي جميل

ظلمتني واشتقت ليك ما اعدلك صدقني ظلمك لي جميل
حرمتني كتبت فيك انك ملك وحدك اصيل

والفرقه قاسيه بي قليبي الفي جراحاتو النزيف
لم اعلم اني بيك مواسم ربيع وبلاك صيف
اشتقت ليك بي شقاوة الزول الرهيف
صدقني ظلمك لي جميل

دي اول مره نتفارق وفي الخاطر زعل
خاطري البشيل ليك الغنى وكل الامل

توهتو في الاعماق كتير
فجرتو في عز الهجير
ما اجملك يوم خصلك الحلوات تطير
وارجف معاك قلبي الحسير

قسيت علي عيون سهد جفونها الابتعاد
لما الكلام القلتو لي بقى احلى زاد

ظلمتني واشتقت ليك ما اعدلك صدقني ظلمك لي جميل
حرمتني كتبت فيك انك ملك وحدك اصيل

محمد ابوعمر 09-28-2014 02:59 PM

غيرك انت مافي

صدقني غيرك انت مافي
تظلمني بالشك والظنون ياحبيب تقسى وتجافي

ابتسامتك كون بحالو نحننا ليها ونشتهيها
والخطاوي ايقاع الغناوي الديمه نشتاق لي مجيها
والعمر لو ضاع معاك ايامو مابنسأل عليها
انحن عشنا الدنيا زاتا عشان وجودك انت فيها

والدروب من غيرك انت مابتودينا وتجيبنا
مابتوطن لي عيونك لا لغيرك ياحبيبنا
نحن عاهدناك قسمنا مابنسيبك لو تسيبنا
لو وفيت عهدك ياغالي تبقى آلامنا وطبيبنا

صدقني غيرك انت مافي وكيفنو موج الشك اهدي
واصفى زي موية عيونك الديمه للافراح تودي
ترجع تزاورنا وتشوفنا غمامة الاحزان تعدي
والشتيلات في بيوتنا لي لقاك تزهر تندي

محمد ابوعمر 09-28-2014 03:00 PM

كان العشم

كان العشم بعد الحصل نتلم
كان العشم انو الريد انشال في الدم
نعاني الحزن الكلو الم
ما اصلو ضريبة الريده الهم
نصبر لما نتلاقى مايهمنا ضاع من عمرنا كم

كان العشم تبقالي مئال
وتر صداح بالغنا محال
تسكن في عيوني اماني وفال
تبقى لي غناي اجمل موال

كان العشم بعد الحصل نتلم
كان العشم انو الريد انشال في الدم
نعاني الحزن الكلو الم
ما اصلو ضريبة الريده الهم
نصبر لما نتلاقى مايهمنا ضاع من عمرنا كم

محمد ابوعمر 09-28-2014 03:01 PM


مظاليمك يازمن

مظاليمك يازمن نحنا
ونفتش لي زمن غيرك
نقول امكن افرحنا

مظاليم الزمن نحن مظاليمو
منتظرنو ارضى علينا
نمرح في ظلال غيمو

اشيل من عمرنا وماشي
سحاباً فوقنا ماراشي
وفايت دارنا ماغاشي
ماعمرنا كان فرح كان هم
ماوتر في الساحه متلاشي

مازمان شايلانا ضحكتنا
وغناوينا وطفولتنا
عصافير جوه جنتنا
اكبر فينا ما قايلنو قاصد تشقى دنيتنا

اتاريك يازمن ظلام
وزي الريد ليك احكام
مظاليمك هنا الايام
وطال ماقلوبنا حاضنا النور
علي الفرحه الأبتنى سلام

بس ياريت من تاني رجعنا
وما عاندنا طاوعنا
وكان لو لحظه تجمعنا
ماكان خدر مشاتل الريد واصبح للعمر معنى

محمد ابوعمر 09-28-2014 03:01 PM

من فتتنا

انت من فتنا
هجر الكنار زاهي الغصون ساب الغنى
والشتله ماعاد النسيم يرقص معاها يحاننها
من فتنا ماحصل ودعتنا
ياريت رجعت تاني وعدتنا

من فتنا وسارت خطاك بعيد
لاشفنا فال لاضقنا عيد
نودع الهم العلينا ويطل حزن جديد
حاول ارجع لينا تاني حتي لو ضاع العديد

انا عندي والله شعور غريب..
اجي يوم تفوتني بلا وداع
وافضل معاك تواه دروب..
وافقد معاك حتى المتاع
من بعدك انت ياما غشانا السراب..
وانكسر حتى الشراع

محمد ابوعمر 09-28-2014 03:02 PM

مهما تبعدني الظروف

الليله ياحليلك ماياك ربيعنا وياكا جميلنا وياكا دليلينا
ياكا سمرنا وياكا سهرنا وياكا اميرنا وياكا قمرنا وياكا ليلنا
يا الشدرا التحتك مقيلنا
في فراقك تجري دموعنا تحاكي سيلنا
ياكا ربوعنا وياكا رجوعنا وياكا نيلنا

مهما بتعدني الظروف يابلدي بخاف عليك
انشد الدعوات اغاني للقدر الساقني منك اجيبني ليك

ما شفتا يابلدي الحنين في الغربه كم تصحى المواجع
وايام العمر تقصر واغرقنا سيلك يا مدامع
وابقى حلمنا ياهو انت وقمرك ابين لينا ساطع
بس عزانا البشرب من مياه النيل ليها راجع

شوقي لي ضل العصاري
البجمع الشبان واضاري
شوقي اللشجره الوريفه
وشوقي لي الطير الخداري
وشوقي لي النيل ومويتو
الديمه لي طافيه ناري

مهما تبعدني الظروف
بجيك وبالوديان بطوف
يا الإنزرع في ارضك منانا
البكانا ومانسانا
شوقي لي النيل في ارتحالو
عبر ارضك يابطانه

لي ليلك الفي قلوبنا ضاوي
للشفق في نعاسو ومجدو باللون السماوي
شوقي لي النيل لي ظلالو
شوقي لي شجرالخلاوي
شوقي لي ناسنا وديارهم
اللي البعيد طال انتظارهم

محمد ابوعمر 09-28-2014 03:02 PM

الريده
الراحل حسن الزبير
ألحان حسن بابكر
غناء محمد ميرغني


ياريده مين بقدر عليك
مين بلقى في دنياك امان
أخضعتي تيجان الملوك و
هزمتي فرسان الزمان
وانا الضعيف
ياريدة كيف أتحملك
بعد عزيز وبعد ملك
أصبحت بي أمرك ملك
مرات أقول وامر قساك
مرات أقول ما أجملك
ياريده شوقك خففي
وحلمك علي إتلطفي
عبر الزمن سرك خفي
ونارك تقيد ما بتنطفي
سايباني في درب الشقا
ونادر علي تتعطفي
ياريدة يا سر الغُنا
لامتين أكون ضايع أنا
أديني يوم خاتم المنى
يسعدني بي أسعد منى
قسمتي للناس الهنا
وأنا لا هناك ولاهنا

محمد ابوعمر 09-28-2014 03:03 PM

جات الريح

وجات الريح .. وجات الريح
جات الريح وشالت زهوري الفي الضريح
ضريح الحب المات..
بلا كلمات..
ولا نغمات..
وروَّح مسيكين الجريح

وحاولت براي اطراهو واذكروا الحُب البداهو
لقيتو يوم جالس براهو ودموعو جاريه مبللاهو
قال لي هاك قليبك وشيل غناهو
أديهو لي ناساً كتر إزيلو آلامو وشقاهو
ياريتني اقدر من عذابك استريح
وجات الريح .. وجات الريح

وماقال لي وين القى ناساً إعزوا قليبي ويكفكفوا دمعتو
اشتاقو لي ولهو الكتير ومحبتو
لكنو مات الحب صحيح
ذكراهو في جوه الضريح
ضريح الحب المات..
بلا كلمات..
بلا نغمات..
وروَّح مسيكين الجريح

محمد ابوعمر 09-28-2014 03:03 PM

ماكفاهو

ماكفاهو قليبي ماكفاهو
بحر السهر حدق العيون والنوم بقالو مستحيل
لا عرفت لي سكة رضاك لاعرفت كيف قلبك بميل
علمتني الصبرِ في هواك كيف ابقى ناكر للجميل

ماعرفت كيف للماشي في دربك سنين يعني ليه معنى الوقوق
وماشفت كيف مر العطش لي زول سكن جنب الجروف
وماشفت كيف مر العناق بدل أمان أعمارنا خوف
وماشفت كيف العيون بتعمى بعدك ومابتشوف
ماكفاهو قلببي ماكفاهو

وبس معقول وعد الفرح أبقى في القلب الرهيف غمامة عذاب تحزنو
ماعرفت لي غير السهر الكنت بعدك بدمنو
وخوفي ابقى علي أمانك وغيرك البديهو منو
وخوفي أبقى على وعودك أبني إنتظارك وأسكنو
وبي هواك علمتني أصل العشق في معدنو
ماعشان عشانك بكن العيون وإتحزنو
ماعشان عشانك غنن أناملي ودندنو
ماكفاهو قليبي ماكفاهو

أنا كنت رقه وكلي إلفه وكلي ماملكة يديك
انا كم بنور كل الظلم الفيني ليك
اصلك مابتجي لا الموت بجي كلو كلو ولاعليك

ماكفاهو قليبي ماكفاهو
بحر السهر حدق العيون والنوم بقالو مستحيل
لا عرفت لي سكة رضاك لاعرفت كيف قلبك بميل
علمتني الصبرِ في هواك كيف ابقى ناكر للجميل

محمد ابوعمر 09-28-2014 03:04 PM

الرساله الجاتني منو

الرساله الجاتني منو شوقو بحضن في حروفو
يالايمني في بعدي عنك وكلو زولاً بي ظروفو

الليل اطول مامعاي زول ودي الغربه وياهو حلها
لما النجوم تتلاشى كيف تكتب دموع العين رساله
للبريده وللبعيده المن ليل بلدي وكحل العين دلالها
إلا عينيك تايهه مني في دلالها وانشغالها
واضيعت القلب الراد وكم قلوب في ثمالها
والغربه ياالحزن الدفين ديمه كم هدت رجالها
وديمه فينا بكى العزاز تهنا في بحورها ورحالها

تقول لي زولك قريب نبضو في جنب الوريد
سكبو فيك اسمى العيون دموعو لي رنو بعيد
والزيي ماشبه الدموع افعل زمانها زي مايريد
الفراق ماكنت ناوي وفي البعاد ماعندي إيد

الليل بهيم وحالي الاليم والعين تدمع
وانا عشت فراقك علي بي احساس الزول لامن اودع
والدرب البسوقني منك مااظن في قريب لي ارجِع

الظروف القاسيه دايما ضيعت زمن التصافي
اشوفك في خيالي وإجي الصباح ألقاك مافي
وارجع للغربه يا اللي مجافي

الرساله الجاتني منو شوقو بحضن في حروفو
يالايمني في بعدي عنك وكلو زولاً بي ظروفو


الساعة الآن 01:20 PM.

Powered by vBulletin® Version 3.8.7
Copyright ©2000 - 2019, Jelsoft Enterprises Ltd
HêĽм √ 3.1 BY: ! ωαнαм ! © 2010
BY: ! BADER ! آ© 2012